ملخص راااائع لانسان يعرف كيف يحافظ على ماله والاهم الطريقه فلولا ان فصل لنا فى ديننا الحلال والحرام لضاعت الاموال واكلت بالباطل ولو انت مش فارق معاك الدين فخدها من باب المحافظه على مالك وربنا يهديك

لو انت رأس مالك ١٠٠ جنيه وسعر سبيكة الذهب النهارده ١٠٠ جنيه وانت عاوز تستثمر في الذهب فالطبيعي إنك بتروح تدفع الـ ١٠٠ جنيه تاخد سبيكة الذهب وتروح..
لو الذهب سعره ارتفع ١٠٪ فأنت بقى معاك ١١٠ جنيه ولو انخفض بنفس النسبة بقى معاك ٩٠ جنيه..

لكن عشان الإنسان طماع بطبعه فالبورصات بتقدر تستغل طمع الإنسان وتقوله بدل ما تشتري سبيكة واحدة بفلوسك إيه رأيك تحط الفلوس دي عندي ضمان وأنا أشتري لك بيها ١٠ سبايك يبقوا باسمك
- طبعاً كله شراء وبيع على الورق بدون أصل مالي حقيقي ولا ذهب يغطي الأصل ده -..
يبقى انت كده حاطط معايا ١٠٠ جنيه بس ومع كده ليك دهب عندي ب ١٠٠٠ جنيه وعليك ٩٠٠ جنيه مديونية..

هنا لو الذهب طلع ١٠٪ فأنت بقى معاك ١١٠٠ يعني كسبت ١٠٠٪ بدل ١٠٪ في حالة الشراء الحقيقي..
وطبعاً المكسب هيغريك إنك بدل ما تسحب فلوسك وفوقهم المكسب وترد المديونية اللي عليك تقوم حاطط المكسب بتاعك وتشتري تآني فتبقى المديونية بتاعتك ١٨٠٠ جنيه على أمل إنك تحقق مكسب أكبر..
هنا انت بتعمل طلب غير حقيقي بفلوس مش موجودة معاك أصلاً..
عشان كده صعود الذهب بيتبعه صعود أكبر جزء منه نتيجة طلب غير حقيقي..

نيجي للسيناريو الكارثي على الناحية التانية لو الذهب نزل ١٠٪ فأنت كل راس مالك طار وبقت عليك مديونية ٩٠٠ جنيه..
هنا البورصة هتقولك أنا هرفع المارين أو هامش الشراء إلى ٢٠٪ مثلا يعني لازم تحط ١٠٠ جنيه تانيين وإلا هبيع الذهب بتاعك اللوقتي..
وفي الحالتين السيناريو كارثي - خاصة لو مش معاك سيولة - قدامك يا إما تخسر رأس مالك كله أو تضحي في مخاطرة تانية وتستلف ١٠٠ جنيه تانيين.. وأغلب الناس والبورصات عشان خايفة على فلوسها بتلجأ للبيع ..
عشان كده هبوط الذهب يتبعه هبوط أكبر..

المثال ده للقريب والتبسيط لكن هو واقع بيتم على نطاق واسع جداً وبيشرحه الاقتصاديين تحت اسم الرافعة المالية أو البيع بالهامش..

وده مش بيحصل في سوق الذهب بس لكن في العقارات والأسهم كمان..
وده أحد أهم أسباب انهيار النظام الاقتصادي العالمي في ٢٠٠٨ لكن بسبب الطمع البشري محدش بيتعلم..
ودي كلها معاملات محرمة شرعاً..

عشان كده في السنين الأخيرة بتلاقي تذبذب كبير في أسعار الذهب والفضة..

لكن لو انت شاري ذهب حقيقي برأس مال حقيقي متشغلش بالك كتير لأن هامش الربح والخسارة مش هيبقى زي اللي بيضارب..

النصيحة هنا إنك أما تستثمر:
- تشتري بفائض مالك مش بالدين.
- تنوع استثماراتك.. متحطش كل فلوسك في حاجة واحدة.
- متبقاش طماع بتجري ورا مكسب كبير في مضاربات حرام شرعاً وممكن تخسرك كل فلوسك.