مساء الخيرات
كلامي اللي جاي مهم وهوضح الصورة اللي حاصلة في السوق الوقت يشباب بشكل مفصل.
سوق الكريبتو بقاله فترة كبيرة يعتبر في حالة جمود وهبوط.
إيه السبب اللي وصلنا للمرحلة الصعبة دي؟
أول حاجة سببه الأساسي هو الزحمة الشديدة في المشاريع ودخول مؤسسات كبيرة بقوة.
طيب ده مفروض مفيد؟
هقولك مفيد على المدى البعيد.
لكن قبل ما نشوف خيره لازم إعادة ترتيب أوراق. يعني إيه؟
المنافسة حاليًا بين المشاريع بقت شرسة واللي معندوش دعم حقيقي بيتضغط عليه وبيختفي، وشفنا عملات بتهبط بعنف ومشاريع بتتحذف من منصات كبيرة وحرفيًا.
المرحلة اللي إحنا فيها دلوقتي اسمها إعادة ترتيب السيولة. السيولة مش بتختفي، هي بتتنقل. طبيعي نشوف عملات تقع ومراكز تتغير، لأن السوق بيغربل نفسه وبيجهز للمرحلة اللي بعدها اللي هتكون مرحلة محدش يتوقعها.
ده أول حاجة.
نيجي بقى لنقطة الفيدرالي ودي ناس كتير مش فاهمها صح.
زمان أول ما الفيدرالي يخفّض الفائدة، السيولة كانت بتدخل على طول في الأسواق عالية المخاطر زي الكريبتو، فكنّا نشوف صعود سريع. دلوقتي الوضع مختلف، لأن اللي حصل في الفترة اللي فاتت كسر ثقة ناس كتير: تلاعبات، إفلاسات، صراعات بين منصات ومشاريع اتنسفت، فالمستثمر بقى حذر جدًا.
فلما نشوف الفيدرالي بيخفض، الناس تبدأ تاخد قروضات وتضخ السيولة دي في أسواق تانية، يعتبر جزء كبير من السيولة اللي كانت بتدخل الكريبتو دلوقتي رايح لأسواق تانية شايفينها أهدى شويه، فحتى لما الفائدة تنزل، التأثير على الكريبتو بيبقى ضعيف أو متأخر. عشان كده بنشوف أحيانًا السوق يهبط مع خفض الفائدة، وده مش تناقض، ده خوف وحذر أكتر منه طمع.
الخلاصة إن الفيدرالي لسه مهم، بس مش هو المحرك الوحيد دلوقتي. السوق محتاج الأول يعيد ترتيب نفسه، وبعدها لما الثقة ترجع، أي قرار فائدة بسيط وقتها هنشوف تأثيره على السوق تاني بشكل قوي زي زمان.
اللي إحنا فيه ده مرحلة إعداد مش نهاية السوق يشباب.