ZOE DEV

🛸အာကာသထဲက ဒေါ်လာဘီလီယံပေါင်းများစွာတန်တဲ့ "အင်တာနက်စစ်ပွဲ" - Elon Musk ရဲ့ Starlink ကို စိန်ခေါ် လိုက်တဲ့ Jeff Bezos ရဲ့ TeraWave 🚀🛰️
ကမ္ဘာကျော်သူဌေးကြီး Jeff Bezos နဲ့ Elon Musk တို့ရဲ့ အားပြိုင်မှုက အခုဆိုရင် ကမ္ဘာမြေမှာတင် မဟုတ်တော့ဘဲနဲ့ ကျွန်တော်တို့ရဲ့ခေါင်းပေါ်က အာကာသအထိပါ ရောက်လာနေပါပြီ။ မိတ်ဆွေတို့လည်း Elon Musk ရဲ့ Starlink အကြောင်း ကြားဖူးကြမှာပါ။ ကမ္ဘာ့ဘယ်နေရာရောက်ရောက် အင်တာနက်ရစေရမယ်ဆိုတဲ့ Starlink ကို အခု Jeff Bezos ရဲ့ Blue Origin ကုမ္ပဏီက "TeraWave" လို့ အမည်ရတဲ့ ဂြိုဟ်တုကွန်ရက်သစ်နဲ့ တရားဝင် စိန်ခေါ်လိုက်ပြီ ဖြစ်ပါတယ်။
ဒါက ရိုးရိုးတန်းတန်း ပြိုင်ဆိုင်မှုမျိုးတော့ မဟုတ်ဘူး။ အနာဂတ်ရဲ့ ဒေတာစီးဆင်းမှု လမ်းကြောင်းတစ်ခုလုံးကို ဘယ်သူက ထိန်းချုပ်မလဲဆိုတဲ့ "အာကာသ အင်တာနက် စစ်ပွဲ" လို့တောင် ပြောလို့ရပါတယ်။
TeraWave ဆိုတာ ဘာလဲ? ဘာကြောင့် ထူးခြားတာလဲ?
Blue Origin ကနေ လွှတ်တင်မယ့် TeraWave က ဂြိုဟ်တုပေါင်း ၅,၄၀၀ ကျော်နဲ့ ဖွဲ့စည်းမယ့် ကွန်ရက်တစ်ခုပါ။ သူတို့က "ငါတို့လည်း Starlink လိုမျိုး အင်တာနက်ပေးမှာပဲ" လို့ ပြောရုံတင် မဟုတ်ဘဲ သူတို့ရဲ့ ပစ်မှတ်က တကယ့်ကို "အကောင်ကြီးကြီး အမှီးရှည်ရှည်" တွေဆီ ဦးတည်ထားပါတယ်။
Starlink က သာမန်အိမ်သုံးသူတွေနဲ့ ဖုန်းအသုံးပြုသူတွေကို အဓိကထားပေမယ့်၊ TeraWave က Data Centers တွေ၊ ကော်ပိုရေးရှင်းကြီးတွေနဲ့ အစိုးရအဖွဲ့အစည်းတွေ ကို အဓိက ပစ်မှတ်ထားပါတယ်။ တစ်နည်းအားဖြင့် Starlink က လူတိုင်းစီးတဲ့ "မြို့ပတ်ဘတ်စ်ကား" ဆိုရင်၊ TeraWave က အရေးကြီးပုဂ္ဂိုလ်တွေနဲ့ ကုန်ပစ္စည်းအများကြီးကို အမြန်ဆုံး ပို့ဆောင်ပေးမယ့် "သီးသန့် လေယာဉ်ကြီး" လိုမျိုး ဖြစ်လာမှာပါ။
အံ့ဩစရာအကောင်းဆုံးအချက်က သူ့ရဲ့ အမြန်နှုန်းလို့ ပြောရပါမယ်။ TeraWave ရဲ့ အမြင့်ဆုံး ဒေတာကူးပြောင်းမှုနှုန်းက တစ်စက္ကန့်ကို 6 Terabits (6 Tbps) အထိ ရှိနိုင်တယ်လို့ ဆိုပါတယ်။ ဒါက အခုလက်ရှိ ရှိနေတဲ့ ဘယ်ဂြိုဟ်တု အင်တာနက်ထက်မဆို အဆပေါင်းများစွာ ပိုမြန်နေတာပါ။ ကျွန်တော်တို့ အခုသုံးနေတဲ့ အင်တာနက်က ရေပိုက်ခေါင်းက ကျတဲ့ရေလိုမျိုးဆိုရင် TeraWave က ရေတံခွန်ကြီးတစ်ခုလုံး စီးကျလာသလိုမျိုး ဒေတာတွေကို အလုံးအရင်းနဲ့ ပို့ပေးနိုင်မှာ ဖြစ်ပါတယ်။
Bezos ရဲ့ ကိုယ်ပွား - TeraWave vs Amazon Leo
ဒီနေရာမှာ စိတ်ဝင်စားဖို့ကောင်းတာတစ်ခု ရှိပါသေးတယ်။ Jeff Bezos က Amazon ရဲ့ ဥက္ကဋ္ဌလည်း ဖြစ်နေပြန်တော့ သူကိုယ်တိုင် တည်ထောင်ထားတဲ့ Amazon ရဲ့ "Project Kuiper" (Leo လို့လည်း ခေါ်ကြတဲ့ ဂြိုဟ်တုစီမံကိန်း) နဲ့ TeraWave က ပြိုင်ဘက်တွေ ဖြစ်မနေဘူးလား? လို့မေးစရာ ရှိလာပါတယ်။
တကယ်တော့ သူတို့က ဈေးကွက်ကို ခွဲယူထားတာပါ။ Amazon ရဲ့ Project Kuiper က Starlink လိုပဲ သာမန်ပြည်သူတွေဆီကို အင်တာနက် ရောက်အောင်သွားမှာဖြစ်ပြီး၊ Blue Origin ရဲ့ TeraWave ကတော့ ခုဏက ပြောခဲ့သလို စီးပွားရေးလုပ်ငန်းကြီးတွေကိုပဲ ကိုင်တွယ်မှာပါ။ ဆိုလိုတာက Bezos က အခြေခံလူတန်းစားကနေ အစိုးရအဆင့်အထိ အင်တာနက်ဈေးကွက် တစ်ခုလုံးကို "အိတ်သွန်ဖာမှောက်" သိမ်းကျုံးယူဖို့ ပြင်ဆင်နေတာပဲ ဖြစ်ပါတယ်။
နည်းပညာ အောင်မြင်မှုနဲ့ ဘေးကဝေဖန်သံများ
Blue Origin အတွက် ၂၀၂၇ ခုနှစ်ကုန်မှာ TeraWave ဂြိုဟ်တုတွေကို စတင်လွှတ်တင်ဖို့ ရည်မှန်းထားပါတယ်။ ပြီးခဲ့တဲ့ နိုဝင်ဘာလတုန်းကလည်း သူတို့ရဲ့ Rocket Booster ကို ပင်လယ်ပြင်ထဲက ရေပေါ်ပလက်ဖောင်းပေါ်မှာ အောင်အောင်မြင်မြင် ပြန်လည်ဆင်းသက်နိုင်ခဲ့ပါတယ်။ ဒီလိုမျိုး ဒုံးပျံကို ပြန်လည်အသုံးပြုနိုင်တဲ့ နည်းပညာက အရင်က SpaceX တစ်ခုတည်းမှာပဲ ရှိခဲ့တာပါ။ အခုတော့ Blue Origin ကလည်း Musk ရဲ့ နည်းပညာကို အမီလိုက်နိုင်ပြီဆိုတာကို သက်သေပြလိုက်တာပါပဲ။
အောင်မြင်မှုတွေရဲ့တစ်ဖက်မှာ ဝေဖန်သံတွေလည်း ရှိနေပါတယ်။ ပြီးခဲ့တဲ့ ဧပြီလတုန်းက Bezos ရဲ့ ဇနီး Lauren Sánchez အပါအဝင်၊ အဆိုတော် Katy Perry တို့လို နာမည်ကြီးတွေနဲ့ ၁၁ မိနစ်ကြာ အာကာသခရီးစဉ်တစ်ခုကို Blue Origin က ပြုလုပ်ခဲ့ပါတယ်။ ကမ္ဘာကြီးမှာ စီးပွားရေးတွေ ကျပ်တည်းနေချိန် ဒီလိုမျိုး ဒေါ်လာသန်းပေါင်းများစွာ အကုန်အကျခံပြီး အပျော်ခရီးထွက်တာက "အခြေအနေမှန်ကို နားမလည်တာကြဘူးလား (Tone deaf)" လို့ လူအများက ဝေဖန်ခဲ့ကြပါတယ်။
ကျွန်တော်တို့အတွက် ဘာတွေ ဘာတွေဖြစ်လာနိုင်လဲ?
ဒီလို ဘီလီယံနာတွေရဲ့ အာကာသပြိုင်ပွဲက ကျွန်တော်တို့လို သာမန်လူတွေအတွက် ဘာအကျိုးရှိမလဲဆိုတာ ဆက်ကြည့်ရအောင်ပါ။
၁။ ကမ္ဘာလုံးဆိုင်ရာ ဆက်သွယ်မှု (Global Connectivity)
အရင်က အင်တာနက်မရနိုင်တဲ့ တောတောင်ထူထပ်တဲ့နေရာတွေ၊ ဝေးလံခေါင်သီတဲ့ ကျွန်းတွေမှာပါ မြန်နှုန်းမြင့် အင်တာနက်တွေ ရလာတော့မယ်။ ဒါက ပညာရေးနဲ့ ကျန်းမာရေးအတွက် အခွင့်အလမ်းသစ်တွေဖြစ်ပါတယ်။
၂။ ဈေးကွက်ယှဉ်ပြိုင်မှု
ပြိုင်ဘက်တွေ များလာလေလေ၊ ဝန်ဆောင်မှု ပိုကောင်းလာပြီး ဈေးနှုန်းတွေလည်း ပိုပြီး သင့်တင့်လာဖို့ ရှိပါတယ်။ Musk တစ်ယောက်တည်း စိုးမိုးထားတဲ့ ဈေးကွက်ထဲကို Bezos ဝင်လာတာက သုံးစွဲသူတွေအတွက်တော့ သတင်းကောင်းပါ။
၃။ စီးပွားရေး အခွင့်အလမ်းသစ်
ဒေတာတွေကို စက္ကန့်ပိုင်းအတွင်း အမြောက်အမြား ပို့နိုင်လာတဲ့အတွက် နိုင်ငံတကာ စီးပွားရေးလုပ်ငန်းတွေ၊ အွန်လိုင်းကနေ အလုပ်လုပ်သူတွေအတွက် တံကားမရှိ၊ ဓားမရှိ တော့တဲ့ အခြေအနေကို ရောက်လာပါလိမ့်မယ်။
ဆိုတော့ Jeff Bezos ရဲ့ TeraWave က Elon Musk ကို စိန်ခေါ်ရုံတင်မကဘဲနဲ့ အနာဂတ်ရဲ့ နည်းပညာလောကကို တစ်ခေတ်ဆန်းစေမယ့် ခြေလှမ်းတစ်ခု ဖြစ်ပါတယ်။ ၂၀၂၇ ခုနှစ်မှာ စတင်မယ့် ဒီခရီးစဉ်ကနေတစ်ဆင့် ကျွန်တော်တို့ရဲ့ ကမ္ဘာကြီးက ဘယ်လောက်အထိ ပိုပြီး ချိတ်ဆက်မိသွားမလဲဆိုတာ စိတ်လှုပ်ရှားစရာပါ။
အာကာသထဲက စစ်ပွဲမှာ ဘယ်သူပဲနိုင်နိုင်၊ အဓိက အကျိုးအမြတ်ရမှာက နည်းပညာရဲ့ အသီးအပွင့်တွေကို ခံစားရမယ့် ကျွန်တော်တို့ သုံးစွဲသူတွေပဲ ဖြစ်ပါလိမ့်မယ်။ မိတ်ဆွေတို့ရော... Starlink နဲ့ TeraWave ဘယ်သူက ပိုပြီး အောင်မြင်မယ်လို့ ထင်သလဲ? အောက်က Comment မှာရေးခဲ့ပေးပါဦး။ အနာဂတ်ကတော့ တကယ်ကို ရင်ခုန်စရာ ကောင်းနေပါပြီ။ 🌟🚀

$TSLA

ရွှေဆိုတာ အရေးကြုံရင် ထုတ်သုံးဖို့၊ ဒုက္ခရောက်ရင် အားကိုးဖို့ စုထားတဲ့ "နောက်ဆုံးခံစစ်" ပါ။ ဒါပေမဲ့ အိမ်ကရှိသမျှ ရွှေထည်တွေရဲ့ ၇၀ ရာခိုင်နှုန်းကျော်ကို ထုတ်ရောင်းပြီး ရန်ပွဲတစ်ခုအတွက် အားသွန်ခွန်စိုက် သုံးနေရပြီဆိုရင်တော့ အခြေအနေက သိပ်မဟန်တော့ဘူးဆိုတာ လူတိုင်းသိပါတယ်။ အခု ရုရှားနိုင်ငံမှာအဲဒီအတိုင်းကိုဖြစ်နေတာပါ။
ကမ္ဘာ့အင်အားကြီးနိုင်ငံလို့ အားလုံးသိထားတဲ့ ရုရှားရဲ့ "ငွေတိုက်စိုး" ဘယ်လို အကျပ်ရိုက်နေလဲဆိုတဲ့ အကြောင်းနည်းနည်းပြောပြမယ်။ ဒါက နိုင်ငံရေးတင်မဟုတ်ဘဲနဲ့ ကျွန်တော်တို့အားလုံးရဲ့ စားဝတ်နေရေးနဲ့ ကုန်ဈေးနှုန်းတွေအပေါ် ဘယ်လို သက်ရောက်လာနိုင်မလဲဆိုတာကိုပါ တွေးကြည့်ဖို့ လိုပါတယ်။
၁။ အရေးပေါ်စုဘူးထဲက ရွှေတွေ ဘာလို့နည်းလာတာလဲ?
ရုရှားမှာ National Wealth Fund (NWF) လို့ခေါ်တဲ့ "နိုင်ငံတော် အရေးပေါ် အရန်ငွေတိုက်" တစ်ခုရှိပါတယ်။ ရေနံရောင်းလို့ရတဲ့ ပိုလျှံငွေတွေကို အနာဂတ်အတွက် စုထားတဲ့ စုဘူးပေါ့ဗျာ။ စစ်မဖြစ်ခင်တုန်းက ဒီစုဘူးထဲမှာ အလွယ်တကူ ထုတ်သုံးလို့ရတဲ့ ငွေသားနဲ့ ပိုင်ဆိုင်မှု ဒေါ်လာ ၁၁၃ ဘီလီယံကျော် ရှိခဲ့ပါတယ်။
အခု ၂၀၂၆ ဇန်နဝါရီမှာ ဒီစုဘူးထဲမှာ ဒေါ်လာ ၅၀ ဘီလီယံလောက်ပဲ ကျန်တော့တာပါ။ အဲဒီပမာဏက သူတို့ရဲ့ အရေးပေါ် ရန်ပုံငွေ တစ်ဝက်ကျော်က ပြောင်သလောက် ဖြစ်သွားပြီ။ ပိုပြီး ထိတ်လန့်ဖို့ကောင်းတာက ဒီရန်ပုံငွေထဲမှာရှိတဲ့ ရွှေအရန်သင့် ပိုင်ဆိုင်မှု ၇၁ ရာခိုင်နှုန်းကျော်ကို ထုတ်ရောင်းပြီး စစ်အသုံးစရိတ်အတွက် သုံးလိုက်ရပြီ ဆိုတာပါပဲ။
၂။ ရေနံကရတဲ့ ပိုက်ဆံထက် စစ်စရိတ်က ပိုများနေသောအခါ
ဆယ်စုနှစ်ပေါင်းများစွာ ရုရှားကို ထမင်းကျွေးလာတာက ရေနံနဲ့ သဘာဝဓာတ်ငွေ့ပါ။ ဒါပေမဲ့ အခုတော့ အခြေအနေက ပြောင်းပြန်ဖြစ်သွားခဲ့ပါပြီ။ "ATM" စက်လို့တင်စားထားတဲ့ ရေနံကနေ ပိုက်ဆံထွက်တာ နည်းလာပြီး "စစ်အသုံးစရိတ်" ဆိုတဲ့ ထွက်ငွေအပေါက်ကြီးက ပိုကျယ်နေပါတယ်။
ကိန်းဂဏန်းတွေအရ ကြည့်ရင် ၂၀၂၅ အတွင်းမှာ ရုရှားရဲ့ ရေနံနဲ့ Gas ဝင်ငွေက ၂၂ ရာခိုင်နှုန်းလောက် ထိုးကျသွားခဲ့ပါတယ်။ နိုဝင်ဘာလ တစ်လတည်းတင် ၃၄ ရာခိုင်နှုန်းအထိ လျော့သွားတာပါ။ ဘာကြောင့်လဲဆိုတော့:
- နိုင်ငံတကာရဲ့ ပိတ်ဆို့မှု (Sanctions) တွေကြောင့် ရေနံကို ဈေးလျှော့ရောင်းနေရတယ်။
- ငွေပေးချေမှုနဲ့ သယ်ယူပို့ဆောင်ရေး လမ်းကြောင်းတွေက ပိုခက်ခဲလာတယ်။
အရင်က ဝင်ငွေနဲ့ အသုံးစရိတ် မျှခြေရှိခဲ့ပေမဲ့ အခုတော့ ဘတ်ဂျက်လိုငွေက ခန့်မှန်းထားတာထက် ၅ ဆလောက် ပိုများနေပါတယ်။ ရိုးရိုးလေး စဉ်းစားကြည့်ရင် ဝင်ငွေ ၁ သောင်းရှိတဲ့သူက အသုံးစရိတ် ၅ သောင်း ဖြစ်နေသလိုမျိုးပေါ့။ ဒီတော့လည်း ရှိတဲ့ရွှေ ထုတ်ရောင်းရတော့တာပေါ့ဗျာ။
၃။ ၂၀၂၆ အလယ် - ရုရှားအတွက် "အနီရောင်အဆင့်"
အခုလက်ရှိ သုံးစွဲနေတဲ့နှုန်း (Burn Rate) အတိုင်းသာ ဆက်သွားမယ်ဆိုရင် စီးပွားရေးပညာရှင်တွေက ၂၀၂၆ ခုနှစ် အလယ်လောက်မှာ ရုရှားရဲ့ အရေးပေါ်ရန်ပုံငွေထဲက ငွေသားတွေ အကုန်ပြတ်သွားမယ် လို့ ခန့်မှန်းထားကြပါတယ်။ ဒါက ဈေးကွက်သမားတွေနဲ့ ကမ္ဘာ့ခေါင်းဆောင်တွေ စောင့်ကြည့်နေရမယ့် "Dead Line" ကြီးပါ။
အဲဒီအချိန်ကျရင် ရုရှားမှာ ရွေးချယ်စရာ လမ်း ၄ ခုပဲ ကျန်ပါတော့တယ်
1. ပထမ စစ်စရိတ်လျှော့ချမယ်။ ဒါက လက်ရှိအခြေအနေအရ ဖြစ်နိုင်ခြေ အနည်းဆုံးလို့ပြောရမယ်။
2. ဒုတိယက ငွေစက္ကူတွေ ထပ်ရိုက်ထုတ်တာပါ။ ဒါကတော့ အဆိုးဆုံးလို့ပြောရမလားပဲ။ ငွေကြေးဖောင်းပွမှု (Inflation) ကို ဖြစ်စေပြီး ကုန်ဈေးနှုန်းတွေ ထိန်းမနိုင်သိမ်းမရ တက်လာပါနိုင်တယ်။
3. တတိယက အခွန်တိုးကောက်မယ်။ ပြည်သူတွေဆီက အခွန်ညှစ်တာက စီးပွားရေး ကျဆင်းမှု (Recession) ကို ဦးတည်သွားစေနိုင်ပါတယ်။
4. နောက်ဆုံးတစ်ခုက ပြည်တွင်းကနေအကြွေးတွေ တိုးယူတာပါ။ အဲ့တာက အတိုးနှုန်းတွေ တက်လာပြီး စီးပွားရေးလုပ်ငန်းတွေ ကျပ်လာနိုင်တယ်။
ဘယ်လမ်းကိုပဲ ရွေးရွေး၊ နာကျင်မှုကတော့ ရှိမှာပါပဲ။
၄။ ဒါက ငါတို့နဲ့ ဘာဆိုင်လို့လဲ?
ဒါနဲ့ ပတ်သက်လို့ နည်းနည်းဆက်ဆွေးနွေးကြည့်ရအောင်။​ "ရုရှားက တိုင်ပတ်ပြီးပိုက်ဆံပြတ်တာက ငါတို့နဲ့ ဘာဆိုင်လဲ" လို့ မေးစရာရှိပါတယ်။ တကယ်တော့ ရုရှားက ကမ္ဘာ့ကုန်စည်စီးဆင်းမှုမှာ အရေးပါတဲ့ "ကစားသမား" တစ်ယောက်ပါ။ သူတို့မှာ ပိုက်ဆံသာ နည်းသွားတာ၊ ကမ္ဘာက လိုအပ်နေတဲ့ သယံဇာတတွေကိုတော့ သူတို့ အခုချိန်ထိ ဆုပ်ကိုင်ထားဆဲပါ။
သူတို့မှာ
- ကမ္ဘာ့ ယူရေနီယံ (Uranium) သန့်စင်မှုရဲ့ ၄၀ ရာခိုင်နှုန်း။ (လျှပ်စစ်စွမ်းအင်အတွက် အရေးကြီးတယ်)
- ကမ္ဘာ့ ဂျုံ (Wheat) တင်ပို့မှုရဲ့ ၂၄ ရာခိုင်နှုန်း။ (မင်းတို့ စားနေတဲ့ ပေါင်မုန့်၊ ခေါက်ဆွဲဈေးတွေနဲ့ တိုက်ရိုက်ဆိုင်တယ်)
- ကမ္ဘာ့ မြေသြဇာ (Fertilizers) ရဲ့ ၁၈ ရာခိုင်နှုန်း။ (ဒါမရှိရင် စိုက်ပျိုးရေးလုပ်ငန်းတွေ ဒုက္ခရောက်မယ်)
- ကမ္ဘာ့ ပယ်လေဒီယမ် (Palladium) ရဲ့ ၄၀ ရာခိုင်နှုန်း။ (ဖုန်းတွေ၊ ကားတွေ ထုတ်လုပ်ဖို့ မရှိမဖြစ်)
ဒါကြောင့် ရုရှားရဲ့ စီးပွားရေး အကျပ်အတည်းက ဘဏ်တွေပြိုလဲတဲ့ "Financial Contagion" ထက်၊ ကုန်ပစ္စည်းတွေ ပြတ်လပ်သွားမယ့် "Supply Shock" ကို ပိုကြောက်ရတာပါ။
ဆိုတော့ ရုရှားက အခုတော့ ဈေးဖိုးတွေမလောက်တော့လို့ ရွှေတွေထုတ်ရောင်းပြီး စစ်ပွဲကို ဆက်တိုက်နေရပါပြီ။ ဒါပေမဲ့ ရွှေဆိုတာ ကုန်နိုင်သလို၊ အရေးပေါ်စုဘူးဆိုတာလည်း တစ်နေ့မှာ ပြောင်သွားနိုင်ပါတယ်။ အခုလာမယ့် ၂၀၂၆ အလယ်ပိုင်းက ရုရှားအတွက်တင်မကဘဲ ကမ္ဘာ့ကုန်စည်ဈေးကွက်အတွက်ပါ အလှည့်အပြောင်းကြီးတစ်ခု ဖြစ်လာနိုင်ပါတယ်။
ကျွန်တော်တို့အနေနဲ့ သတိထားရမှာက ကမ္ဘာ့တစ်ဖက်ခြမ်းက စီးပွားရေး အကျပ်အတည်းက ကျွန်တော်တို့ရဲ့ မီးဖိုချောင်ထဲက ဆန်အိုး၊ ဆီအိုးတွေအထိ ရိုက်ခတ်လာနိုင်တယ်ဆိုတာပါပဲ။ အခြေအနေတွေကို မျက်ခြေမပြတ် စောင့်ကြည့်ရင်း၊ ကုန်ဈေးနှုန်း အတက်အကျတွေအတွက် ကြိုတင်ပြင်ဆင်ထားဖို့လည်း လိုပါလိမ့်မယ်။
အရေးကြီးတာက အင်အားကြီးနိုင်ငံတွေတောင်မှ စနစ်တကျ မစီမံနိုင်ရင် "အရေးပေါ်စုဘူး" ဆိုတာ ပြောင်သွားတတ်တယ်ဆိုတဲ့ သင်ခန်းစာကို မိတ်ဆွေတို့ကိုလည်း ရစေချင်တာပါ။ မိတ်ဆွေတို့ရဲ့ထင်မြင်ချက်လေးတွေကိုလည်း အောက်က Comment မှာ ရေးခဲ့ပေးပါဦး။
$BTC

🔥Crypto accueille des "rouges" tous les jours. C'est aussi la nature du Crypto. Les fluctuations de prix la nuit sont liées aux conflits politiques de l'autre côté du monde, ce qui le rend d'autant plus intéressant.

À cause de Trump, la probabilité que le prix du Bitcoin tombe en dessous de 80 000 $ est de 30 %
Aujourd'hui 2026, le matin du 20 janvier est plutôt agréable pour les Crypto-traders. Au début de la nouvelle année, Bitcoin (BTC) avait atteint 95 000 $ et "cette fois, nous allons atteindre 100 000 $" espéraient mon frère et moi. Cependant, maintenant le prix est retombé en dessous de 91 000 $, et des nouvelles inquiétantes commencent à ressortir.

🇺🇸🏦Est-ce que le marché des cryptomonnaies va monter si la FED réduit les taux d'intérêt en décembre ??
🏦 La Réserve fédérale américaine (FED) devrait réduire les taux d'intérêt d'environ (25) points de base en décembre selon les prévisions de JP Morgan.

Un jour, un type de sentiment qui ressemble à celui d'un Crypto Bro qui pleure sans raison. Quand le prix chute, on est en colère ; quand le prix monte, on est content, ce sentiment est similaire à celui de la période où il y avait des coupures de courant en Birmanie, où l'on se fâchait pendant la coupure et se réjouissait lorsque le courant revenait… c'est un sentiment très similaire.