Негізгі тұжырымдар
SushiSwap – орталықтандырылмаған биржа (DEX). Ол пайдаланушыларға орталықтандырылған делдалсыз, смарт келісімшарттар арқылы токендерді тікелей айырбастауға мүмкіндік береді.
SushiSwap SUSHI басқару токенін енгізді, ол иелеріне протокол шешімдеріне дауыс беру құқығын және сауда алымдарының бір бөлігін алу мүмкіндігін береді.
Іске қосылғаннан бері SushiSwap айтарлықтай кеңейіп, 35-тен астам блокчейн желілерінде орналасты. 2023 жылы капитал тиімділігін арттыру үшін v3 шоғырландырылған өтімділік функциясын енгізді.
SushiSwap – бұл Орталықтандырылмаған биржа (DEX) негізінде құрылған автоматтандырылған маркет-мейкер (AMM) моделі. Ол дәстүрлі тапсырыстар кітабына немесе орталықтандырылған делдалға сүйенбей, пайдаланушыларға криптовалюта токендерін смарт келісімшарттар арқылы тікелей айырбастауға мүмкіндік береді. Бастапқыда 2020 жылдың қыркүйегінде Uniswap-тың форгы ретінде іске қосылған SushiSwap, өзінің жеке SUSHI токені арқылы қауымдастық басқаруын енгізді. Бұл токен иелеріне протоколдың даму бағытын анықтауға тікелей қатысу мүмкіндігін берді.
Іске қосылған сәттен бастап SushiSwap бір тізбекті Ethereum DEX-тен 35-тен астам желіде жұмыс істейтін көп желілі протоколға айналды, ал оның өнімдер жиынтығы жай ғана токендерді айырбастау шеңберінен шығып кетті. Бұл нұсқаулық SushiSwap-тың қалай жұмыс істейтінін, SUSHI токенінің қызметін, протокол ұсынатын өнімдерді және қатыспас бұрын ескеру керек тәуекелдерді қамтиды.
SushiSwap-тың шығу тарихы
SushiSwap-ты Chef Nomi және 0xMaki деген бүркеншік атпен танымал екі анонимді әзірлеуші Uniswap-тың ашық бастапқы коды негізінде жасап шығарды. Протокол Uniswapөтімділік провайдерлерін SUSHI сыйақылары үшін өздерінің LP токендерін SushiSwap-қа орналастыруға ынталандыру арқылы іске қосылды. Бірнеше күн ішінде 1 миллиард доллардан астам актив стекингке қойылды. Кейіннен бұл LP токендері SushiSwap-тың меншікті пулдарына көшірілді, бұл биржаның ресми іске қосылуын білдірді.
Іске қосылу процесі даусыз болған жоқ. Іске қосылғаннан көп ұзамай Chef Nomi әзірлеушілер қорының бір бөлігін ETH-ке айналдырып жіберді, бұл қауымдастық арасында үлкен алаңдаушылық туғызды. Кейіннен қаражат қайтарылып, жетекшілік уақыт өте келе басқа тарапқа ауысты. Бұл оқиға қауымдастық басқаратын (DeFi) протоколдарының тәуекелдері мен тұрақтылығының айқын мысалдарының біріне айналды. Бұл тәжірибе орталықтандырылмаған басқару қауымдастыққа маңызды бақылау бергенімен, күнделікті жұмысқа жауапты тұлғалардың адалдығына да тәуелді екенін көрсетті.
SushiSwap қалай жұмыс істейді
SushiSwap AMM-ге негізделген DEX ретінде жұмыс істейді. Ол сатып алушылар мен сатушыларды тапсырыстар кітабы арқылы сәйкестендірудің орнына, смарт келімішарттарда бұғатталған токен жұптарының жиынтығы болып табылатын өтімділік пулдарын қолданады. Өтімділік провайдерлері пулға екі токеннің тең құнын салып, өз үлестерін білдіретін LP токендерін алады. Трейдерлер осы пулдар арқылы айырбас жасап, алым төлейді, ол алым өтімділік провайдерлеріне пулдардағы үлестеріне қарай бөлінеді.
SushiSwap Ethereum-дағы ERC-20 токендерін және басқа қолдау көрсетілетін желілердегі соған ұқсас токен стандарттарын айырбастауды қолдайды. 2023 жылы SushiSwap v3 шоғырландырылған өтімділік функциясын енгізді, бұл өтімділік провайдерлеріне капиталды толық баға қисығы бойынша емес, белгілі бір баға диапазонында бөлуге мүмкіндік береді. Бұл әдіс өз позицияларын белсенді басқаратын провайдерлер үшін капитал тиімділігін арттырады, бірақ бастапқы модельмен салыстырғанда күрделірек. Сондай-ақ SushiSwap-та RouteProcessor функциясы қолданылады – бұл бірнеше өтімділік пулдары арқылы ең тиімді орындау жолын тауып, пайдаланушыларға айырбас кезінде жақсырақ баға алуға көмектесетін смарт-маршруттау мүмкіндігі.
SUSHI токені
SUSHI – SushiSwap-тың негізгі токені және ол екі негізгі функцияны атқарады: басқаруға қатысу және алымдарды бөлісу. SUSHI иелері алым құрылымындағы өзгерістерді, жаңа өнімдерді шығаруды және қазынаны басқаруды қамтитын SushiSwap-ты жақсарту ұсыныстарына (SIPs) дауыс бере алады. Қауымдастыққа негізделген бұл модель протоколдың даму бағытын оның белсенді қатысушыларының мүдделерімен сәйкестендіруді көздейді.
SUSHI иелері өз токендерін xSUSHI-ге айырбастау үшін SushiBar-да стекингке қоя алады. xSUSHI иелері SushiSwap пулдарында жасалған сауда алымдарының бір бөлігін алады. Алымдар жиналған сайын xSUSHI-дің SUSHI-ге қатысты арақатынасы біртіндеп артады, бірақ нақты табыс сауда көлеміне және нарықтағы ағымдағы жағдайға байланысты болады.
Көптеген DeFi басқару токендері сияқты, SUSHI бағасы іске қосылғаннан бері айтарлықтай құбылмалылықты бастан кешірді, бұл жалпы DeFi нарықтық циклдерін де, SushiSwap-тың жеке қолданылу трендтерін де көрсетеді. SUSHI құны мен протокол арқылы алынған кез келген сыйақылар айтарлықтай өзгеруі мүмкін және оларға кепілдік берілмейді.
SushiSwap өнімдер жиынтығы
Токендерді айырбастаудан бөлек, SushiSwap өз экожүйесінде бірнеше қосымша функцияларды дамытты:
Көп блокчейнді орналастыру
SushiSwap 35-тен астам блокчейн желісінде, соның ішінде Ethereum, BNB Chain, Arbitrum, Optimism, Polygon, Base және Avalanche желілерінде іске қосылды. Мұндай ауқымды қамту SushiSwap-ты негізінен бір желіде ғана жұмыс істейтін DEX-терден ерекшелейді және пайдаланушыларға экожүйелердің кең ауқымында SushiSwap-тың AMM моделі мен алымдарды бөлісу құрылымына қол жеткізуге мүмкіндік береді.
Шоғырландырылған өтімділік (v3 жаңартуы)
v3 жаңартуы шоғырландырылған өтімділікті енгізді, бұл провайдерлерге өз капиталын сауда белсенділігі ең жоғары болады деп күтілетін нақты баға диапазондарына шоғырландыруға мүмкіндік береді. Бұл өз позицияларын белсенді басқаратын провайдерлер үшін салынған капиталға қатысты жоғарырақ алым табысына әкелуі мүмкін, бірақ сонымен бірге баға таңдалған диапазоннан шығып кетсе, жоғарырақ уақытша шығын тәуекелін тудырады.
BentoBox және Kashi
BentoBox салынған активтерді SushiSwap экожүйесіндегі бірнеше стратегиялар бойынша пайдалануға мүмкіндік беру арқылы капитал тиімділігін арттыруға арналған токен қоймасы ретінде енгізілді. Бұл активтер әртүрлі қолданбаларда, соның ішінде BentoBox негізінде жасалған Kashi несиелеу платформасында қолданыла алатын еді. Kashi тәуекелдердің таралуын шектеу үшін әрбір несие жұбы дербес жұмыс істейтін оқшауланған несие нарықтарымен ерекшеленді. Бүгінгі таңда Kashi жұмыс істемейді және оны SushiSwap командасы қолданыстан шығарды. BentoBox блокчейн инфрақұрылымы ретінде әлі де болса да, ол негізінен ескірген компонент болып саналады және экожүйедегі белсенді әзірлеудің немесе қолданыстың негізгі объектісі емес.
SushiSwap пен Uniswap салыстыруы
SushiSwap пен Uniswap – екеуі де ұқсас іргелі механикаға негізделген және капитал тиімділігін арттыру үшін шоғырландырылған өтімділік функциясын енгізген AMM негізіндегі DEX-тер. Олардың арасындағы негізгі айырмашылықтарға мыналар жатады:
Басқару және алымдарды бөлісу: SushiSwap-тың SUSHI токені xSUSHI алымдарын бөлісу механизмі арқылы иелеріне протоколдың сауда белсенділігінен тікелей қаржылық үлес алуға мүмкіндік береді. Uniswap-тың UNI токені басқару құқығын бергенімен, қазіргі уақытта сауда алымдарынының иелеріне дәл осындай жолмен таратпайды.
Көп блокчейнді қамту: SushiSwap 35-тен астам желіде орналастырылған; Uniswap бірнеше желіге дейін кеңейгенімен, оның орналастыру стратегиясы өзгеше.
Протоколдық инновациялар: Uniswap v4 архитектуралық тұрғыдан айтарлықтай өзгеріс болып табылатын «хуктарға» негізделген реттелетін пулдарды енгізді. SushiSwap-тың дамуы көп желілі кеңеюге, RouteProcessor маршруттауына және BentoBox қойма экожүйесіне бағытталған.
TVL және көлем: Uniswap, әдетте, құлыпталған жалпы құн мен сауда көлемі бойынша жоғары көрсеткіштерді сақтап келеді. Екі протокол да агрегаторлармен және басқа AMM-дермен қатар бәсекелестікке толы DEX ортасында жұмыс істейді.
DeFi экожүйесінде пайдаланушылардың әртүрлі қажеттіліктерін қанағаттандыратын бірнеше AMM протоколдарына орын бар. DEX агрегаторлары және маршруттау технологиясының жетілдірілуі AMM бәсекелестігінің алғашқы кезеңдерінде өте маңызды болған өтімділіктің фрагментациялану мәселелерін азайтты.
Ескеру қажет тәуекелдер
Кез келген DeFi протоколы сияқты, SushiSwap-қа қатысу да пайдаланушылар қаражат салмас бұрын түсінуі тиіс маңызды тәуекелдерді қамтиды:
Смарт келісімшарт тәуекелі: SushiSwap функциялары аудиттерден өткеніне қарамастан, әлі анықталмаған осалдықтары болуы мүмкін смарт-контрактілерге тәуелді. DeFi саласындағы бұрынғы оқиғалар тексерілген кодтың да мінсіз емес екенін көрсетті.
Тұрақсыз шығын: Пулдағы екі токеннің салыстырмалы бағасы бір-бірінен алшақтағанда, өтімділік провайдерлері уақытша шығынға ұшырауы мүмкін. Баға таңдалған диапазонан шығып кетсе, шоғырландырылған өтімділік позициялары бұл әсерді күшейтуі ықтимал.
Токеннің құбылмалылығы: SUSHI иелерінің басқару арқылы қабылдаған шешімдері протокол механикасын, алым құрылымын және қазыналық бөліністерді өзгертуі мүмкін. Қауымдастықтың басқару жүйесі дұрыс жұмыс істеуі үшін белсенді әрі хабардар қатысушыларға сүйенеді.
DeFi саласындағы кіріс фермерлігі және өтімділікпен қамтамасыз етудің қалай жұмыс істейтіні туралы кеңірек танысу үшін Академияда негізгі ұғымдар мен тәуекелдерді қамтитын арнайы нұсқаулықтар бар (Қосымша оқу).
SushiSwap-ты пайдалану қауіпсіз бе?
SushiSwap – бұл кастодиандық емес протокол, яғни пайдаланушылар өз активтерін орталықтандырылған тарапқа сеніп тапсырмай, жеке әмияндары арқылы бақылауда ұстайды. Оның келісімшарттары қауіпсіздік аудитінен өткен, бірақ ешқандай аудит барлық тәуекелдерді толық жоя алмайды. Кез келген DeFi протоколындағы сияқты, пайдаланушылар өздері әрекеттесетін нақты пулдарды немесе өнімдерді зерттеп, тек жоғалтуы мүмкін деп есептейтін қаражатты ғана салғаны жөн.
Қорытынды ойлар
SushiSwap автоматтандырылған маркет-мейкерлік қызметті көп желілі орналастырумен және SUSHI токені арқылы қауымдастық басқаруымен біріктіре отырып, орталықтандырылмаған биржалардың эволюциясын көрсетеді. Жалпы DeFi экожүйесінің бөлігі ретінде SushiSwap кастодиандық емес сауда мен басқарудың мүмкіндіктері мен күрделілігін айқындап, хабардар түрде қатысу мен тәуекелдерді сезінудің маңыздылығын атап өтеді.
Қосымша оқу
• Автоматтандырылған маркет-мейкер (AMM) дегеніміз не?
• Uniswap дегеніміз не және ол қалай жұмыс істейді?
• DeFi жүйесіндегі өтімділік пулдары дегеніміз не?
• Орталықтандырылмаған қаржы қызметтеріндегі (DeFi) кіріс фермерлігі дегеніміз не?
Жауапкершіліктен бас тарту: Бұл контент сізге «сол қалпында» тек жалпы ақпараттық және білім беру мақсатында, ешқандай мәлімдемесіз немесе кепілдіксіз ұсынылған. Ол қаржылық, құқықтық немесе басқа да кәсіби кеңес ретінде қабылдауға болмайды, сондай-ақ ол қандай да бір нақты өнімді немесе қызметті сатып алуға ұсыныс болып табылмайды. Тиісті кәсіби кеңесшілерден кеңес алғаныңыз жөн. Егер мазмұнды үшінші тарап ұсынса, бұл пікірлер сол үшінші тарапқа тиесілі екенін және Binance Academy көзқарасын білдірмейтінін ескеріңіз. Цифрлық активтердің бағасы құбылмалы болуы мүмкін. Инвестицияңыздың құны төмендеуі немесе жоғарылауы мүмкін және сіз салған қаражатыңызды қайтара алмауыңыз ықтимал. Инвестициялық шешімдеріңізге тек өзіңіз жауаптысыз және Binance Academy сіз шеккен шығындар үшін жауап бермейді. Толығырақ ақпарат алу үшін біздің Пайдалану шарттарынан,, Тәуекел туралы ескертуден және Binance Academy шарттарынан қараңыз.